Ien e brievenbus, n pakje! “Haar jim wat besteld?” “Nee, niet dat k wiet…” Open dat ding! Komt der n boek uut, prachteg boek en der stijt aan e veurkaant dudelk wat je te doen hebt: “Moest lezen”! t Westerketier verbeeld, en onderaan: N LANDSCHAP IEN ACHT KUNSTENOARSPERTRETTEN.
t Pakje komt van de Stichting Mien Westerkwartier, de club van Geert Zijlstra, Tonko Ufkes, Omke Oudeman en heurent. t Is t Kammeroadenkedo veur 2012 en t zigt der hiel mooi uut.  Kammeroadenkedo???? Joa, de Stichting Mien Westerkwartier het ondersteuners, en die noemen ze KAMMEROADEN! Veur 25 euro ien t joar kun je ok KAMMEROAD worden en dan krieg je t kammeroadenkedo kedo!  Veur 2012 is dat t boek “Moest lezen”, schreven deur Sietse van der Hoek, en met prachtege foto’s nomen deur Omke Oudeman.

Veurkaant van "Moest lezen" t kammeroadenkedo van Stichting Mien Westerkwartier veur 2012. Kun je ok ien e winkel kopen!

Ien t boek stoan 8 interviews met kunstenoars uut dit gebied, lu as Gert Sennema, Jikke Jager en Agnes van Eupen.  (Al woont dizze leste niet meer ien t Westerketier, mor ien Drenthe, ien Meppen). Der stoan ok 8 gedichten van de bekende regiodichters bij de interviews, kom je de noamen en t werk van Tonko Ufkes, Melle Hijlkema, Klaas Duursma, Lucie Pakes, Alie de Vries, Willem T.Oostenbrink, Are Meijer en Reinder Hiemstra in dit boek tegen, goed verteerboar. Mooie ploatjes derbij, je moeten t eiglieks zölf bekieken.
Wel der as kunstenoar ok ienstijt? Ien uut Noordhörn, onze buurvrouw: Sigrid Frensen! Sigrid tekent en schildert botanisch en dat dut ze bizunder knap. Ekstroa reden om doch dat boek es ien te kieken. Beter nog: om doch dat boek te kopen! Nog beter: om doch mor kammeroad te worden van Stichting Mien Westerkwartier en dan krieg je t boek kedo! (Kiek mor even op www.mienwesterkwartier.nl.)

Sigrid Frensen botanisch bezeg, benoam ien t kleurpotlodencircuit; interview met heur ien t boek "Moest Lezen"!

“Moest lezen” – uutgoave van Stichting Mien Westerkwartier en Philip Elchers – Groningen 2011 (ISBN 978 90 5048 124 3)