Uut de bezettingstied

Op n kwoaie dag ien 1943 kwam t bericht dat ale torenklokken ienleverd worren mozzen. De Duutsers haren verlet om materioal veur d’oorlogsindustrie. n Poar doagen loater kwam der n aannemersfirmoa bie de toren dai de klok deruut toakelde en op t schoulplak del zette.
Dou ging der wat deur de Noordhörners hèn! Heur klok, dai van 1549 of ien de toren hongen haar, mos omsmolten worren tot oorlogstuug… De klok dai 400 joar zien bronzen klanken over Noordhörn en omgeving heuren loaten haar, smörgens, smiddags en soavends. As der braand was, ludde de klok. Generoatsies Noordhörners bennen onner klokgelu noar t kerkhof brocht. Bie oorlogen en overstromingen ien onze gewesten, honderden joaren leden, vluchtten de mensken ien de kerk, God aanroupend om hulp! En de klok mor baaiern! En dou ston e doar, op t schoulplak… Ale Noordhörners gingen der noar tou en keken noar de inskripsie. n Enkele nam n foto. Aalmoal gingen ze met n vrang gevuil ien hoed noar huus. Dai verdomde moffen! Dat ze ons dat aandeden!
n Dag loater wer t lutje klokje uut t Hamstertorentje derbie zet om ofvoerd te worren, de grup over.

n Koppeltje Noordhörner vrijgezellen zaten dai oavend, dou klokken doar stonnen, bie Piet Leujes om stamtoavel ien jachtwaaide. t Zat dai jonges nait lekker met de torenklok. Doar mos wat aan doan worren! Mor wat? Der was onneerd om klok ien Fobbe Homans gracht te dondern. Mor om 1800 kilo n poar honderd meter te vervoeren zunder dat t deur de Grüne Polizei of de Nederlandse plietsie zain wer, was onmeugelk. Mor ze waren t der aalmoal over ains: “Der mos wat gebeuren! Nog veur spertied!” Doar wazzen jonges bie zo as Job en Haarm Nijenhuus, Berend de Wit en Oabel Koazemier dai oareg wat ien de mouwen haren. Met knipwichten en hevelstokken wrutten ze net zo laank de klok achterover dat ze t lutje Hamster klokje der onnerschoeven konnen en laiten de grode klok weer terug floepen.
Anerdoags groot tumult ien t loug! t Hamsterklokje was stolen!! Hou zol dat oflopen? Zol Noordhörn n dikke boete kriegen of zollen der mensken veur oppakt worren? Bange onrust! Mor dat vol dus loater met.
Op blz. 90 van t bouk “De Geschiedenis van Zuidhorn“ staait n foto woarop twai torenklokken. Mor t onnerschrift klopt nait. Wat ik hier verteld heb, is de woare toudracht zo as mie deur mien bruier Leendert verteld is. Hai was der ok bie!

Joh.Lodewegen
oktober 1989

Illustratie met onderschrift op bladzij 90 Geschiedenis van Zuidhorn (Profiel, Bedum, 1986)