foto: webstee pervinzie Grunnen

GS van Grunnen hebben n drokke dag had, guster. Knopen deurhaauwen, vaalt nait mit asmits. t Is nog gehaaim, je mouten t nait wieder vertellen, mor der komt, as t aan GS ligt, n gehaaime weg rond Noordhörn. Das veur de ontsloeten van Noordhörn, staait in t Dagblad. Koos B. het dat aargens opvongen in ain van de supergehaaime wandelgangen van t Pervinziehoes. t Was nait veur hom beduild, mor hai is nait doof ja.
Dunderdagoavend is der n openboare heuroavend bie Baalk (holdt der nog aine n poar griepstuver over aan aal dat gekaauwel), mor woarschienlek is ook dij oavend gehaaim. Koos B. was hailendal onnersteboven van t nijs, hai schrift dat GS “de rondwegvariant met een wijde boog om Noordhorn” omaarmt. Nou, hou laank binnen dij aarms din wel van Calon, Bleker, Slager & consorten…. Willen ze dij rondweg verdaipt aanleggen, op n ofstandje zai je der niks van en as je blind binnen ook nait. (Doarom komt der ook n heúroavend, dat geluud, doar zitten ze nog mit in moage). Krekt of ze n knien oet de hoge houd tovern: t köst nog minder ook….. Wat je mit n rekenmesjientje nait aal doun kìnnen. Volgens Swagerman, dat is dij SP’er mit de grootste mond in de Stoaten, luustern GS noar de waffels dij t haardste reren, hai veurzugt n heksenketel. Heurt gain mìns meer wat, GS ook nait. Bin benijd of der nou ains wat deurgaait, of dat dij swabberkonten van t Pervinziehoes nog mor ains weer aner kaande opswoaien.
Schut mie net deur kop: Binnen wie nou in Noordhörn ontsloten of  opsloten? En as wie votdoadelk in 2017 dìn goud ontsloten binnen, zitten we dìn ook weer degelk opsloten? Vroagen, vroagen, vroagen….. As der dunderdag in dij heksenketel dìn mor antwoorden te beluustern bìnnen. Zol dat kìnnen: n gehaaime rondweg? En wel betoalt dat? Of komt dat oet dij alternatieve pot van de Zuderzeeliene? Of zitten der nog segoaren in aigen deuze? Och, t is zo mor dunderdag en veurjoar wordt t ook wel.                                                                                                                                                       Doemke
Vrachtverkeer straks grotendeels langs berg (= hoge brug) en dal (= verdiepte rondweg)???
foto: ©janblaauw, noordhorn, 2007